香菇肉燥飯

最近大埔開返我兒時既台灣食店 (日月居), 佢地幾年前摺左...開左地產舖, 最近終於都BYEBYE 左.. 係佢裝修既時候我已經估... 吓! 唔知會唔會開返呢?! 點知真係開返WOOO.. 但返兜個屎坑, 就一定好多人... 我有一日食左.. ummmm 好難得可以keep 得返個quality... 但因為人手唔夠... 佢地既service 就差左d 喇... 再加上大家都因為太掛住佢地既珍珠奶茶喇... 所以真係好多人..

如是者, 我有一日又買左d 食餃料想包餃子, 點知我阿媽就同我講佢包水餃叫我返去食... 咁我就可以慳返喇!!!

就係咁... 我就有斤五花腩係到... 靈機一觸... 不如自己整滷肉飯/ 肉燥飯

其實滷肉同肉燥唔同在於D 肉係肉碎(前者)定係肉丁(後者), 口感上有唔同... 但味道呢... 其實各處鄉村各處例喇...

5人份量, 60-90分鐘

材料:

1. 五花腩 1斤
2. 冬菇 4隻
3. 紅蔥頭 5粒
4. 蒜頭 1粒
5. 鹽 1/2 茶匙
6. 生抽 2湯匙
7. 冰糖 1/2 茶匙
8. 白酒 1湯匙
9. 油 1/4 湯匙

做法:

1. 五花腩洗乾淨, 切細丁, 肥膏另外切開之後會用黎整左D 豬油先
2. 鑊燒熱, 放油, 用小火, 將舊豬肥膏放落去, 好快舊肥膏就會出晒油... D 油唔好浪費.. 我地會拎黎整今次既肉燥飯... 放晒D油... 剩返個舊就係豬油泎喇... 真係一D 野都唔會浪費嫁...
3. 豬油整緊既同時.. 我地就整埋D 冬菇同蔥頭喇
4. 冬菇要用熱水浸軟, 切丁, 冬菇水留返
5. 紅蔥頭, 蒜頭切片
6. 豬油泎拎起, 將切好既紅蔥頭, 蒜頭放落去油鑊到炒香至金黃色, 成左油蔥酥, 兜起備用
7. 同返同一個鑊, 加豬肉炒香, 落所有調味同冬菇, 拌勻, 加埋D 油蔥酥, 拌勻
8. 最後加水蓋過肉面, 煮滾轉小火收汁就得喇!!!

P.S.: - 肉煮緊既同時.. 我地都可以整D 烚蛋放入去就變成滷蛋, 同D 肉燥一齊餸飯就一流喇!!!!

- 另外我地今晚係台灣夜 (其實係懶只係煮左滷肉), 所以就拎左皮蛋同酸薑當一味餸, 酸薑係媽咪既朋友俾佢既.. 好好味呀!!!

- 阿媽咁岩又滷左牛肉, 正呀... 拎埋黎餸飯.. 真係岩晒今日既台灣之夜呀!!!